Една од најголемите диви на хрватската музичка сцена денеска го слави својот 84 роденден. Тереза Кесовија ја привлекувала музиката уште од рана возраст. Како дете, таа била член на хорот на дубровничката катедрала. Се запишала во музичко училиште, а воедно и во стручно училиште, од кое набрзо дипломирала. Студирала музика на Музичката академија во Загреб, каде свирела и во Симфонискиот оркестар на Радио Загреб. Кариерата ја започнала по дипломирањето на отсекот за флејта.
За време на својата долгогодишна кариера настапувала на домашни фестивали во Сплит, Опатија, Загреб, Сараево, Белград… Настапувала со песни од бројни автори, а гостувала и на фестивали во Братислава, Рио де Жанеиро, Мексико, Сопот, Анталија и Берн.
Таа двапати пееше на Евровизија. Во 1966 година го претставувала Кнежевството Монако, а во 1972 година настапува како претставник на Југославија со песната „Музика и ти“. Кариерата ја изгради во Франција во 60-тите и 70-тите години, каде што се прослави со „Песната на Лара“ од филмот „Доктор Живаго“. Во 1988 година имала солистички концерт во париската Олимпија.
24sata.hr
