Глобалниот хидролошки циклус е надвор од рамнотежа поради човечките активности, со сушите и екстремните врнежи што ги поттикнуваат климатските промени, нагласи денес Светската метеоролошка организација (СМО), јавува Анадолу.
„Глечерите и ледената покривка се повлекуваат пред наши очи. Зголемените температури го забрзаа и, исто така, го нарушија циклусот на водата“, изјави генералниот секретар на СМО, Петри Талас, на прес-конференција во ОН.
„Потопла атмосфера задржува повеќе влага. Гледаме многу епизоди на пообилни врнежи и поплави. А во спротивна крајност, повеќе испарување, сува почва и поинтензивни суши.“
Во моментов 3,6 милијарди луѓе се соочуваат со неадекватен пристап до вода најмалку еден месец годишно, што се очекува до 2050 година да се зголеми на повеќе од 5 милијарди, според СМО.
„Глобално, сега веќе знаеме дека околу половина од светот има доживеано почести поплави, а околу една третина од планетата се соочува со раст на сушните периоди“, рече Талас, истакнувајќи дека СМО е единствена агенција на ОН специјализирана за водите, временските услови и климата.
– Зголемување на потенцијалот за поплави –
„Знаеме дека затоплувањето на климата за еден степен значи дека имаме 7 отсто повеќе влажност во атмосферата, што значи дека се зголемува потенцијалот за поплави.“
Сушите и екстремните врнежи предизвикуваат големи штети врз животот на луѓето и економиите, се вели во извештајот на Светската метеоролошка организација, која обезбедува опсежна процена на светските водни ресурси.
Топењето на снегот, мразот и глечерите ги зголемија опасностите од поплави и ја загрозија долгорочната обезбеденост со вода за милиони луѓе.
Но СМО вели дека многу малку се знае за вистинската состојба на слатководните ресурси во светот во извештајот, кој се смета за сеопфатен и конзистентен преглед на водните ресурси во светот.
Тоа го нагласува влијанието на климатските, еколошките и општествените промени, нагласи Талас.
Светот не е во состојба да управува со она што не го мери, се вели во извештајот на СМО насловен „Состојбата на глобалните ресурси на вода 2022“, кој апелира на фундаментална промена на политиките.
„Мора да има подобрен мониторинг, споделување податоци, прекугранична соработка и процена на водните ресурси, како и здружено зголемување на инвестициите за да се олесни ова“, се вели во извештајот на СМО.
„Ова е од витално значење за да му се помогне на општеството да се справи со зголемените екстреми на премногу или премалку вода“, се додава.
Извештајот на Светската метеоролошка организација за Состојбата на глобалните водни ресурси првпат беше објавен во 2022 година.
Во новиот извештај се додадени информации за важни хидролошки варијабли, како што се подземните води, испарувањето, издашноста на водотеците, складирањето на копнената вода, влагата на почвата, криосферата (замрзнатата вода) и хидролошките катастрофи.
Интегрира теренски набљудувања, податоци од далечинско набљудување со сателити и симулации за нумеричко моделирање со цел да се проценат водните ресурси во светот.
извор:Анадолу.
фото:Анадолу.