Цената на криптовалутата биткоин за првпат надмина 81.000 долари по реизборот на Доналд Трамп за претседател на САД, кој умерено гледа кон дигиталните средства и поради очекувањата за прокрипто претставници во Конгресот, известува Анадолу.
Според податоците што ги објави компанијата за анализа „Coinmarketcap“, вредноста на криптовалутите на глобалниот пазар, вклучувајќи го и биткоинот, е зголемена за 3,21 % во период од 24 часа и надминала 2,71 трилион долари.
Цената на биткоинот, најголемата криптовалута, порасна за повеќе од 3 % во последните 24 часа поради умереното гледиште на Доналд Трамп кон дигиталните средства, кој е реизбран за претседател на САД.
За време на изборната кампања, Трамп вети дека ќе ги направи Соединетите Држави „криптоцентар на светот“ со прифаќање на дигиталните средства. Трамп има и „национален план за резерви на биткоин“.
Цената на биткоинот денеска за прв пат на азиските пазари надмина 81.000 долари и се искачи на 81.858 долари. Неделната добивка на биткоинот, со кој се тргуваше за 81.263 долари заклучно со 7:31 часот по средноевропско време, надмина 17 %.
Биткоинот, чие најниско ниво оваа година изнесуваше 38.505 долари на 23 јануари, од тој датум се зголеми за приближно 66 %. Биткоинот минатата година ја заврши со вредност од 42.283 долари.
Зголемувањето на вредноста на биткоинот позитивно влијаеше и на другите криптовалути.
Етереум, кој е на второто место според пазарна вредност, порасна за повеќе од 27 % во последните 7 дена и надмина 3.200 долари за прв пат во последните 3 месеци. И алтернативната криптовалута доџкоин го достигна своето највисокото ниво во последните три години.
Аналитичарите изјавија дека републиканците ќе ги контролираат и двата дома во САД и истакнаа дека од аспект на криптосветот, тоа е позитивно примено од инвеститорите.
Од друга страна, индустријата за криптовалути потроши повеќе од 119 милиони долари во поддршката на кандидатите за Конгресот кои се прокрипто.
