Денеска (14.11.2024), во рамките на посетата на словенечкото министерство за внатрешни работи, македонската делегација предводена од директорот на Бирото за јавна безбедност Александар Јанев ги посети воздухопловната и специјалната единица на словенечката полиција.
Македонската делегација одблиску се запозна со капацитетот и опремата со која располагаат овие единици, нивната организација и функционалност. Исто така, се разговараше и за потпишување на меморандум за конкретна соработка помеѓу воздухопловните единици на двете министерства, со акцент на обука на наши воздухопловни инструктори и стручна помош за отварање и имплементирање на школата за пилоти во рамки на нашето МВР. Исто така, стана збор и за организирање идни заеднички оперативни вежби на двете антитерористички специјални единици.
На крајот на посетата изведени беа показни симулациски вежби на неколку разработени сценарија, со учество на хеликоптерската и специјалната единица на словенечката полиција. Македонската и словенечката полиција уште еднаш на дело ја покажаа заложбата за взаемна соработка на сите нивоа и успешно справување со предизвиците кои ги имаат двете земји и регионот во одржување на јавната безбедност и справувањето со сите видови на криминал.
