Русија денес објави дека воведува реципрочни санкции за 13 актуелни и поранешни британски официјални претставници, меѓу кои се и премиерот Борис Џонсон, министерката за надворешни работи Лиз Трас и министерот за одбрана Бен Валас, јавува Агенција Анадолија (АА).
Москва забрани влез во Русија и на неколкумина други членови на Кабинетот и политичари поради „непријателските потези на британската Влада, особено воведувањето санкции против високи руски функционери“ поради војната против Украина, се наведува во соопштението на руското Министерство за надворешни работи.
„Овој чекор е преземен како одговор на незаузданата политичка и кампањата со информации на Лондон, насочена кон меѓународна изолација на Русија, создавање услови за контрола на нашата земја и задушување на домашната економија“, соопшти Министерството.
Обвинувајќи ја Велика Британија за намерно влошување на ситуацијата во Украина со испраќање тешко оружје и координирање на слични напори во НАТО, се додава дека провокациите на Лондон ги принудиле не само неговите западни сојузници, туку и други земји, да воведат големи антируски санкции.
На црната листа за влез во Русија се вклучени и вицепремиерот Доминик Раб, поранешната премиерка Тереза Меј и првата министерка на Шкотска Никола Старџен.
Војната на Русија против Украина наиде на меѓународна осуда, при што САД, Велика Британија и ЕУ, меѓу останатите, воведоа низа санкции кон Москва.
Најмалку 1.982 цивили ги загубија животите, а 2.651 е повреден во Украина од почетокот на војната кон крајот на февруари, според проценките на ОН, кои стравуваат дека вистинските бројки се многу поголеми.
Над 4,6 милиони Украинци побегнаа во други земји, додека над 7 милиони се внатрешно раселени, соопшти Агенцијата за бегалци на ОН.
извор: Агенција Анадолија (АА).
