Американскиот претседател Џо Бајден вчера објави дека Карин Жан-Пјер ќе биде првата Афроамериканка што ќе ја извршува функцијата главен портпарол на Белата куќа, јавува Агенција Анадолија (АА).
„Жан-Пјер ќе ја замени портпаролката во заминување, Џен Псаки, која ќе ја напушти Белата куќа на 13 мај“, објави извршната куќа во соопштението. Жан-Пјер претходно беше заменик-портпаролка на Бајден и ги информираше новинарите и од брифинг-салата во Белата куќа и од претседателскиот авион „Ер форс уан“.
„Карин не само што го носи искуството, талентот и интегритетот потребни за оваа тешка работа, туку таа ќе продолжи да го води патот во комуникацијата за работата на администрацијата на Бајден – Харис во име на американскиот народ“, рече Бајден.
„Џил и јас ја познаваме и ја почитувавме Карин долго време и таа ќе биде силен глас што ќе зборува за мене и оваа администрација“, додаде тој.
Бајден дополнително се заблагодари на својата портпаролка во заминување, велејќи дека Псаки „го поставила стандардот за враќање на пристојноста, почитта и умешноста во брифинг-салата во Белата куќа“.
„Сакам да ѝ кажам благодарам на Џен што ги подигна границите, што комуницираше директно и вистинито со американскиот народ и ја задржа смислата за хумор додека го правеше тоа. Ѝ благодарам на Џен за нејзините услуги за земјата и ѝ посакувам сѐ најдобро додека напредува“, додаде тој.
Псаки беше главна портпаролка на Белата куќа повеќе од една година откако Бајден ја презеде функцијата во 2021 година.
Се дознава дека Псаки треба да преземе улога во левичарската телевизиска информативна мрежа МСНБЦ (MSNBC).
извор: Агенција Анадолија (АА).
