Хеликоптер со четиричлен екипаж, кој учествувал во гаснење на пожарот на грчкиот остров Самос, попладнево се урна во море, а спасено е едно лице, јави дописничката на МИА од Атина.
Од противпожарната служба на Грција соопштија дека станува збор за хеликоптер од типот ER-MHY (Mi-8 MTV-1) кои тие го изнајмиле да помага во пожарот, а од членовите на екипажот тројца се странски државјани и еден Грк.
Тие додаваат дека во спасувачката акција, што е во тек, спасен е еден член на екипажот.
Грчката новинска агенција АНА-МПА објави дека е спасено уште едно лица, односно вкупно двајца од четворицата членови на екипажот.
Според грчката телевизија ЕРТ, хеликоптерот паднал од мала височина, односно кусо откако наполнил вода од морето и во моментите кога почнал да се оддалечува од површината.
извор: МИА
