Германскиот министер за здравство, Карл Лаутербах, предупреди дека некои германски болници би можеле да банкротираат поради енергетската и инфлациската криза, пренесува Агенција Анадолија (АА).
„Ако не реагираме брзо и навистина драстично, ќе дојде до затворања“, рече Карл Лаутербах за јавната телевизија „АРД“, додавајќи дека утре ќе преговара со министерот за финансии Кристијан Линднер за поголема владина помош за болниците.
Сепак, тој дотогаш не може да даде „никаков ред на големина“ во однос на висината на помошта.
Лаутербах рече дека не е можно да се формира „специјален фонд“ за болниците во Германија, сличен на специјалниот фонд од 100 милијарди евра за војската.
„Не можеме да воведеме посебен фонд за секоја област“, рече тој, додавајќи дека сѐ мора да се исплати.
Се работи за барање на Здружението на германски болници, кое стравува од затворање на многу болници, бидејќи недостигаат околу 15 милијарди евра за материјални трошоци и енергија во оваа и следната година.
Стапката на инфлација во Германија во септември се зголеми на 10,9 отсто. Сојузниот завод за статистика (Дестатис) објасни дека стапката на инфлација на тој начин достигнала „историско високо ниво од обединувањето на Германија“. Причините се „огромните поскапувања“ на енергетските производи и храната.
Водечките германски економисти веќе подолго време предупредуваат дека зголемувањето на цените на бензинот може да ја турне најголемата економија во ЕУ во рецесија. Според експертите, Германија следната година ќе биде една од земјите најтешко погодени од глобалното економско забавување.
извор:Агенција Анадолија (АА).
фото: Агенција Анадолија (АА).