Според последните податоци, 18 лица загинаа, а многу се повредени во големото невреме со силен ветер и силен дожд што ги зафати југот и средниот запад на САД и продолжи кон исток, јавуваат службите и медиумите. Најмалку пет лица загинаа во Арканзас, соопштија официјални лица, додека спасувачите ја пребаруваа областа за повеќе жртви додека торнада ечеа низ државата.
Ветровите дуваат со над сто на час
Властите објавија и еден смртен случај во Илиноис и три во Индијана, а локалните медиуми денеска објавија дека седум лица загинале во округот Мекнаири, Тенеси, на границата со Мисисипи. Фокс њуз објави еден смртен случај во Алабама и една жртва во Мисисипи. Националната метеоролошка служба на САД издаде предупредување за силно невреме со грмотевици за делови од државата Њујорк и Пенсилванија, со удари на ветер до 105 км/ч.
Дожд и ветер се очекуваат во источниот дел на Охајо и делови на Западна Вирџинија, соопшти метеоролошката служба. Силен ветер со удари до 100 км/ч се очекува и во главниот град Вашингтон. Во Арканзас, градоначалникот на Литл Рок, Франк Скот, изјави за новинарите дека околу триесетина луѓе биле пренесени во болниците поради различни повреди.
Новинарката од Литл Рок, Лара Фараф, изјави за АФП дека торнадото ги носело покривите на зградите и објави фотографии на социјалните мрежи. Во Арканзас, како што пренесуваат локалните медиуми, повеќе од 78.000 луѓе останале без струја.
index.hr