Kлиниката Жан Митрев објави видео од целото интервју направено за порталот ИРЛ.
„Со цел јавно, транспарентно и директно информирање на јавноста ја објавуваме целосната снимка од интервјуто на д-р Жан Митрев дадено за екипата на ИРЛ. Интервјуто што е поставено на Јутјуб каналот и достапно за гледање, е автентично, без никакви интервенции и монтирање. Ги содржи сите прашања и одговорите од д-р Митрев, целосните одговори без сечење, лепење и комбинирање на одговори од различни прашања како би биле извадени од контекст и ставени во функција на намерата на ИРЛ да се оцрни и обвини докторот“, соопштија од Клиниката.
„На снимката јасно се гледа дека д-р Митрев е отворен да одговори и одговара на сите прашања и токму затоа бара неговите одговори да бидат објавени целосно без да се интервенира и без да се комбинираат одговори од различни прашања, со цел да се заштити вистината и фактичката состојба. Сепак сомнежите во намерите на ИРЛ и целта на правењето на овој документарец се потврдија затоа што токму тоа е направено во документарецот на ИРЛ, дадените одговори се сечени, лепени и комбинирани и вадени од вистинитиот контекст и ставени во друг, тенденциозен и далеку од вистината“, стои во соопштението.
Како што тврдат, при снимањето на интервјуто од порталот ИРЛ ветиле дека целосната снимка ќе ја објават на Јутјуб, но иако поминале шест месеци, тие не го објавиле целосното интервју.
„Токму ова зборува за нивната интенција да се креира случај таму каде што нема и за тенденциозноста на целата приказна“, обвинуваат од Клиниката.
„Зошто ИРЛ го прави овој документарец, зошто во документарецот не се опфатени сите информации, зошто ИРЛ не ја објави целосната снимка од интервјуто? Одговорот на овие прашања е во снимката и настапот на екипата на ИРЛ пред отвореноста и целосната соработка на д-р Митрев и Клиниката Жан Митрев“, прашуваат од приватната Клиника „Жан Митрев“.
видео Клиника Жан Митрев
