Со високите станарини во Истанбул на крај не може да излезе ниту најмоќната банкарка во Турција – Хафизе Еркан се пресели повторно кај родителите!
Високите станарини во турската метропола Истанбул се чини ја совладаа дури и најмоќната банкарка во земјата: Хафизе Гаје Еркан, шефица на Турската централна банка, се вратила да живее со своите родители. „Не можевме да најдеме сместување во Истанбул. Ужасно е скапо. Се сместивме кај моите родители“, вели 44-годишната Еркан во денешното (16.12) интервју за весникот „Хуриет“, објави dw.com.
„Дали е можно Истанбул да е станат поскап од Менхетен?“, прашува натаму Еркан во интервјуто.
Пред да биде назначена за шефица на Турската централна банка, Еркан две децении живееше во САД. Таа таму работеше на менаџерски позиции во неколку големи банки, вклучително и Голдман Сакс.
Турција со месеци е зафатена од висока инфлација. Во Истанбул, станарините пораснале за 77,1 отсто во споредба со истиот период лани, покажува студијата на универзитетот Бахчешехир. Како контрамерка, турската влада го ограничи зголемувањето на киријата на 25 проценти. Според експертите, оваа мерка дополнително ја влошила ситуацијата на пазарот, затоа што станоиздавачите сега се обидуваат да се ослободат од своите потстанари со сите средства, понекогаш дури и незаконски, со цел повторно да ги изнајмат недвижностите за цени кои се многукратно повисоки.
Во борбата против инфлацијата, Турската централна банка под водство на Еркан ја зголеми основната каматна стапка за 8,5 проценти – на 40%. Сепак, на овие „мерки за затегнување на монетарната политика“ сега им дојде крајот, изјави Еркан за „Хуриет“.