По пожарот кој ја пеплоса Универзалната сала во Скопје, увидни екипи со јавен обвинител од Основното јавно обвинителство Скопје денеска (10.04) излегоа на терен. Локацијата е обезбедена, по што се создадени услови за да започне увидот. Контроли врши и трудовиот инспекторат. Во меѓувреме тројцата градежни работници, коишто беа повикани на разговор, се пуштени на слобода, бидејќи нема основ да бидат задржани.
Се собираат докази
Од изутрината се собираат докази од објектот на Универзалната сала каде во вторникот (09.04) изби пожар, кој ја опустоши внатрешноста на објектот, а се урна и покривот.
„Локацијата ќе биде детално прегледана за да се обезбедат сите докази неопходни за утврдување на причините за настанување на пожарот. Стручно вешто лице ќе се произнесе дали пожарот е евентуално предизвикан од човечки фактор или се работи за несреќен случај“, велат од Обвинителството.
Ослободени тројцата работници
Државниот инспекторат за труд веќе извршил контрола на работењето на фирмите ангажирани за реконструкција на објектот и изготвил записник. Полицијата само неколку часа по пожарот информираше дека се приведени тројца градежни работници коишто биле ангажирани околу реконструкцијата на објектот. Бидејќи нема основ за нивно задржување, од Обвинителството велат дека тие се пуштени дома.
„Бидејќи сѐ уште трае фазата на прибирање докази, односно до овој момент не е утврдено дека пожарот настанал како последица на човечки фактор, во полициска станица беа земени изјави од три задржани лица, по што тие беа пуштени со оглед на тоа што во оваа фаза нема основ за нивно натамошно задржување“, велат од Јавното обвинителство.
DW
