Метеоритот што падна на Земјата во близина на Берлин во јануари е стар околу 4,5 милијарди години и припаѓа на ретката класа на аубрити, напишаа научниците во статија објавена претходно оваа недела во списанието Meteoritics & Planetary Science.
Малиот астероид 2024 BX1 изгоре во атмосферата во близина на Берлин на 21 јануари, во спектакуларно небесно шоу. Фрагментите паднале на земја во областа Хавеланд во Бранденбург, која ја опкружува германската престолнина, а многу од нив се собрани од научници и колекционери.
Приближно 202 фрагменти со вкупна тежина од 1,8 килограми се пронајдени во поле во близина на бранденбуршките села Рибека, Берге и Лицов, расфрлани на површина од 1,5 на 10 километри.
Научниците го нарекоа метеоритот Рибек по местото каде што е пронајден.
Студијата на истражувачите предводени од Институтот за планетологија на Универзитетот во Минстер, која беше објавена во списание во средата, откри дека Рибек припаѓа на исклучително ретка класа на аубрити кои се богати со магнезиум и силициум.
Рибек има посебен статус во оваа ретка класа бидејќи карпата содржи исклучително висок процент на силикатен минерал фелдспат, открија научниците.
Истражувачката група претпоставува дека родителското тело на Рибек е старо околу 4,5 милијарди години и дека потекнува од астероидниот појас помеѓу Марс и Јупитер.
Научниците ја објаснија и причината зошто фрагментите мирисаа силно на водород сулфид, слично на мирисот на расипани јајца: хемиските реакции помеѓу минералите и влагата го предизвикаа мирисот и ја променија минералогијата на карпата.
