Под влијание на многу постудена воздушна маса од север, која ќе биде поврзана со Атмосферски фронт, во недела и во понеделник ќе имаме нагла и голема промена на времето. Ќе има поголема облачност, особено во недела кога ќе има повремени врнежи од дожд и локална појава на грмежи. Не се исклучува можноста и за појава на локално невреме.
Во недела и во понеделник ќе дува засилен, повремено силен ветер од северен правец (над 60 км/час), и истиот најмногу ќе биде изразен Долж Повардарието. Во недела попладне и во вечерните часови, и тоа поради заладувањето, можно е провејување на снег на највисоките планински места во државава.
Што се однесува до температурите, тие во недела попладне и навечер нагло и значително ќе опаднат, за околу, па дури и за повеќе од 10 степени во споредба од оние кои ги имаме сега. Во северните предели температурите ќе опаднат и за повеќе од 15 степени, па така особено постуден ден ќе биде понеделник кога наутро температурите ќе се спуштат во интервалот од 3 до 11 степени, на високите и на планинските места тие се очекува да се спуштат до околу, или за некој степен под нулата, а максималните дневни температури во понеделник ќе се искачуваат во интервалот од 11 до 19 степени.
Уште постудено утро и тоа поради целосното разведрување ќе имаме во вторник кога минималните температури ќе се спуштаат во интервалот од -2 до 7 степени. НАПОМЕНА: Во понеделник и во вторник наутро е можна појава на слана и на мраз на повеќе места низ Македонија.
Оваа нагла и бурна промена на времето секако лошо ќе се одрази врз метеопатите, пишува во најновата најава од метеопрогнозерот Славчо Попоски.
