– Брод на италијанската морнарица денес исплови за Албанија, пренесувајќи уште една група мигранти чии барања за азил, според контроверзниот план, ќе бидат процесуирани во оваа балканска земја, јавува Анадолу.
Бродот на италијанската морнарица „Либра“ ги превезува мигрантите во центрите во Албанија со кои раководи Италија, лоцирани на околу 170 километри од италијанскиот брег, преку Отрантската Врата.
Бродот, со осум мигранти спасени во понеделникот кај италијанскиот остров Лампедуза, се очекува да пристигне во миграцискиот центар во пристаништето Шенѓин, северна Албанија, утре.
Минатиот месец Италија ја испрати првата група од 16 мигранти во Албанија, но подоцна италијанскиот суд пресуди дека нивниот притвор е неважечки, наредувајќи им на властите да ги вратат во Италија.
Судот образложи дека матичните земји на мигрантите не се сметаат за безбедни.
Како одговор на пресудата, италијанската Влада, предводена од Џорџија Мелони, усвои нова регулатива за надминување на судските пречки во контроверзниот договор со Албанија за мигрантите.
Контроверзниот петгодишен договор за пренесување на барателите на азил во земја што не е членка на ЕУ беше пофален од некои земји што, како Италија, се изложени на голем мигрантски товар. Сепак, групите за човекови права го критикуваа, предупредувајќи на можни прекршувања на човековите права.
