Делегација на ВМРО-ДПМНЕ, предводена од претседателот Христијан Мицкоски оствари средба со Стопанската комора на северо-западна Македонија во рамки на редовните дијалози со претставниците од стопанството и бизнис секторот.
На средбата беше разговарано за економската состојба во државата, која од двете страни беше оценета како исклучително тешка.
Стопанствениците истакнаа дека нивниот сектор се соочува со голема потешкотија да се обезбеди рентабилност и ликвидност во работењето поради високите цени на енергенсите како еден од основните инпути во производството и трговијата. Исто така беше истакната потребата од зголемени инфраструктурни инвестиции како на централно ниво, така и на ниво на единиците на локалната самоуправа како одговор на кризата.
Делегацијата на ВМРО-ДПМНЕ ја повтори подготвеноста во периодот кој следи да ја зајакне поддршката на барањата на стопанствениците како клучен сегмент во една економија.
Претставниците на ВМРО-ДПМНЕ дадоа силно уверување дека забрзано и посветено ќе продолжи реализацијата на проектите на општините во насока на подобрување на бизнис климата и инфраструктурата за поголем економски развој.
Исто така беше истакната потребата од итни пакет мерки и даночни олеснувања како за потребите на граѓаните, така и за потребите на компаниите. Македонија според многу економски параметри се соочува со економска катастрофа која отвори сериозна инфлаторна спирала и ниска економска активност кои се далеку полоши од податоците за останатите земји од регионот со кои имаме иста или слично структурирана економија.
Од страна на ВМРО-ДПМНЕ беа реафирмирани предлог мерките за намалување на ДДВ за храната, основните трошоци и горивата, за кои власта остана глува, мерки со кои треба да се овозможи полесно справување со растечката сиромаштија и заканата од стагфлација.
Впрочем заради овие клучни проблеми во македонската економија имаме ситуација на речиси 12 илјади затворени компании за 15 месеци и над 214 илјади помалку работоспособни лица на пазарот на труд што ќе преставува потешкотија да се надомести како и во овие периоди на криза така и по неа.
ВМРО-ДПМНЕ останува на ставот дека економските неуспеси не се само резултат на глобалните текови, туку и на неспособноста и корупцијата на владата која кризите само ги катализира. Потребата од промени е неопходна за раст на економијата и повисок стандард на населението.
извор: ВМРО ДПМНЕ
фото: ВМРО ДПМНЕ
