Поранешниот претседател на Македонија и долгогодишен лидер на СДСМ, Бранко Црвенковски вели дека таму каде што бевме лани, се наоѓаме и сега, без видлив и сериозен напредок.
– Тоа не се однесува само на Македонија, туку и на другите земји од регионот. Единствен исклучок можеби е Албанија за која беше донесена одлука за почеток на преговорите. Ние ги отворивме, но не ги почнавме преговорите. Како што стојат работите, тешко е да се предвиди кога тоа ќе се случи, додаде тој.
Црвенковски е песимист околу проширувањето на ЕУ.
-Да се потсетиме дека заради новата методологија за водење на преговорите што ја предложи Франција, а не заради бугарското вето, во октомври 2019, и покрај позитивната препорака на ЕК, Македонија не ги почна преговорите со ЕУ. Во овие 3 години, ниту Србија, ниту Црна Гора не направија видлив чекор напред во процесот на преговори, нагласи Црвенковски.
Додаде дека фактите говорат дека интеграциите на целиот регион се во застој со повремени мали исчекори.
– Според мене, во моментов нема простор за поголем оптимизам ниту во наредните години. Во ЕУ, посебно кај старите членки, се зајакнува ставот: прво реформа на ЕУ, а потоа проширување, рече Бранко Црвенковски на денешната дебата на тема „Северна Македонија меѓу Отворен Балкан и Берлински процес: можно ли е побрзо членство во Европската Унија?“ во организација на Здружението за надворешна и меѓународна политика Совет на амбасадори.
