Владата во пресрет на избори ги намали коефициентите за платите на директорите, но тие нема да им се намалат, туку благо ќе пораснат. Највисок коефициент има директорот на АНБ, по него следи координаторот за реализацијата на програмата на владата. На тоа место е поранешниот шеф на кабинет на доскорешниот премиер Димитар Ковачевски, Мартин Попов, со плата од над 2000 евра.
Владата им ги намали коефициентите за пресметка на плата на 157 функционери, покажува одлуката објавена во Службен весник. Станува збор за функционери што таа ги именува. Со одлуката се намалуваат коефициентите на генералниот секретар на владата, владиниот портпарол, националните координатори и нивните заменици, директорите на управите, на инспекторатите, на бироата, државните комисии, агенциите, заводите, фондовите, директорите на затвори…
Коефициентите за функционерите што ги именува Владата се намалуваат за 12,8 проценти, одговорија од оваа институција на прашање на Радио Слободна Европа.
Според Одлуката, објавена во Службен весник, коефициентите за функционерите што ги назначува Владата сега се движат од 1,91 до 3,48
Сепак, и покрај намалување на коефициентите за пресметка на плата, функционерите нема да останат со куси ракави. Нивните плати нема да се намалат или благо ќе се зголемат и покрај намалувањето на коефициентите, затоа што просечната бруто плата е покачена за 15 отсто. Просечната бруто плата во 2022 година била 47.637, а во 2023 година достигнала 54.916 денари.
Кој од директорите има највисока плата?
Најнискиот коефициент од 1.91 е за замениците директори на одредени агенции, а највисок од 3,48 има директорот на Агенцијата за национална безбедност (АНБ). Зад него со 3.40 е националниот координатор за следење на реализација на програма на Влада и претседателот и членовите на инспекцискиот совет. Коефициент над 3 имаат и генералниот секретар на Владата, директорот на технолошко -развојните зони, заменик -директорот на АНБ, директорот на Агенција за странски инвестиции и неговиот заменик.
Текстот во целост на: slobodnaevropa.mk
