Косовските цариници денеска на граничниот премин „Генерал Јанковиќ“ со Македонија откриле и заплениле 83,5 килограми хероин. Полицијата уапсила седум лица, јавија албанските медиуми.
Дрогата е откриена на царинскиот терминал на преминот „Генерал Јанковиќ“, скриена во опрема за осветлување во камионска приколка. Била спакувана во 160 пакувања.
Службеници на Основното обвинителство во Урошевац соопштија дека за овој случај се уапсени седум лица, а по двајца се трага.
„Најдовме количина од приближно 83,5 килограми. Полициските истражители потоа презедоа акција на терен во соработка со главниот обвинител и продолжија со рациите во Приштина и Пеќ. Досега седум лица се задржани во притвор до 48 часа, а по две лица се трага“, изјави директорот на Единицата за борба против наркотици, Решат Мурсељи.
Косовскиот министер за внатрешни работи, Џељаљ Свечља им четстита на институциите за успешно изведената акција за спречување на шверцот со дрога.
– Кога меѓу различните институции постои волја за искрена соработка со цел да се обезбеди владеењето на законот и борба против организираниот криминал, резултатите се неминовни. Честитки на Царината, Полицијата и Обвинителството, напиша Свечља на неговиот Фејсбук.
фото: Архива
