Вечерва околу 20 часот, десет цивилни полицајци влегле во домот на лидерот на ГЕРБ Бојко Борисов во Банкаја, јави репортерот на БГНЕС.
Првично МВР соопшти дека Борисов е уапсен со уште три лица, меѓу кои Владислав Горанов, Менда Стојанова и Севделина Арнаудова. Малку по 21 часот, пак, оваа вест е избришана од веб-страницата на МВР.
Подоцна МВР го објави следното соопштение: „Во тек е голема операција во врска со 120 случаи на Европското обвинителство во Бугарија. Претреси и заплени се вршат на многу адреси. Во моментов се приведени Бојко Борисов, Владислав Горанов, Менда Стојанова и Севдалина Арнаудова. Акцијата продолжува“.
Заменик-претседателот на ГЕРБ, Даниел Митов, го опиша тоа што се случува како акција на Гестапо. Адвокатот Менко Менков изјави дека не смеел да го посети домот на Борисов. „Немам поим што прават, чекаат наредба од началник. Очекувам и мене да ме уапсат“, изјави Менков во домот на Борисов.
„Борисов не е приведен, ова е груба манипулација со фактите. Ова не е во служба на вистината. Борисов е дома. Неговиот адвокат беше примен еден час по почетокот на постапката. Ова е груб прекршок“, изјави Десислава Атанасова, претседателка на ПГ на ГЕРБ.
Портпаролката на обвинителството Сиика Милева рече дека обвинителството не било информирано за акцијата, објави БГНЕС.