Под влијание на моќен Џеновски циклон, во Македонија следува период на променливо облачно време со повремени врнежи од дожд, локално поинтензивни и проследени со појава на грмежи.
Обилни врнежи од дожд на многу места низ Македонија ќе има во текот на ноќта петок кон сабота, како и во сабота. Локално ќе биде нестабилно и со појава на грмежи, а можни се и поинтензивни атмосферски процеси во форма на невреме, со што локално е можна појава дури и на град.
Во петок, како и во недела ќе биде многу ветровито, односно на повеќе места ќе дува засилен, повремено силен ветер од јужен правец (повремено и локално со брзина од 60 до 80 км/час).
До недела локално во Македонија ќе наврне значително количество на воден талог (над 30 л/м2, локално и над 50 литри дожд).
Во Скопје и околината очекуваме слично време, со поинтензивни врнежи од дожд во текот на ноќта петок кон сабота, но и во сабота. И во Скопскиот регион очекуваме засилен ветер од јужен правец.
Температурите, иако за неколку степени пониски, сепак и понатаму ќе бидат натпросечно високи и ќе се искачуваат во интервалот од 17 до 23 степени, додека за време на викендот тие ќе се искачуваат во интервалот од 15 до 21 степени.
Апелираме доколку во следниот период се случат електрични празнења, да не се претстојува на отворен простор и под осамени дрвја. Исто така во случај на појава на силен јужен ветер препорачуваме крајна внимателност.
Невреме му се заканува на целиот регион, кој исто така е под влијание на овој моќен Џеновски циклон.
Во Алпскиот регион овој циклон условува интензивни врнежи од снег и вистинска зима, пишува во својата објава метеопрогнозерот Славчо Попоски.