Ножот на Тутанкамон бил изработен од вонземско железо

0
413

Тутанкамон како владетел загинал на неполни 20 години и е попознат по предметите најдени во неговиот гроб отколку по неговото владеење. Благодарение на современата технологија, т.е. нов неинвазивен метод, научници египтолози открија дека неговата позната железна кама со златна рачка всушност била направена од вонземски материјал, односно метеорит, а со помош на релативно ретка техника на ковање.

Историските податоци велат дека Тутанкамон бил и последниот владетел на египетската 18-та династија, а неговата гробница била пронајдена пред околу еден век. Таа содржи над 5.000 артефакти коишто до денес се проучуваат и анализираат за да се утврди нивното потекло и да се открие како тие завршиле кај него. Покрај златната маска, престолот и другите предмети, железните артефакти се реткост. Но, археолозите веруваат дека во тоа време токму железото било симбол на висок статус во општеството. Од досегашните достапни податоци, знаеме дека топењето железо не било многу вообичаено во регионот, а позачестената работа со железо почнала околу 1.200 п.н.е. – еден век по Тутанкамон.

При спектроскопијата со флуоресцентни рендген-зраци, било откриено големо присуство никел во железото. И додека трагите од никел во земјиното железо не надминуваат четири отсто, уделот на никел од 11 отсто во камата укажува на вонземско потекло на материјалот, т.е. веројатно се работи за метеорит.